2018-09-04 - 草稿

  .....སྟོན་མཇུག་གིས་བསྐྱེད་པའི་ཚོར་སྣང་ཐན་ཐུན།

                                            * འགར་ཚེ་རྒྱལ།

མེ་ཏོག་གི་བཀྲག་མདངས་ཡལ་དུས།
རྩྭ་ལྗང་གིས་སྐྱ་ཐིང་ཐིང་གི་ལྭ་བ་གྱོན།
རླུང་བུའང་ཁུ་སིམ་མེར།
ས་སྲོད་ཀྱི་དུས་སུ་འཁྱག་སིབ་སིབ།
དགོང་ཁའི་ཉི་འོད་ཀྱི་ཁ་དོག་ལ་འཐིམ།
སྐར་ཚོགས་ཀྱིས་ཁེངས་པའི་ནམ་མཁའ།
དྭངས་གསལ་གྱི་ཟླ་འོད་ལ་འདྲེས་ཏེ།
མཚན་མོར་ཧ་ཅང་མཛེས།

སྤང་རྒྱན་མེ་ཏོག
ཕྱོགས་ཡོང་གི་མགྲོན་པོ་བཞིན།
བཞུད་འགྲོ་བའི་དུས་ཚིགས་ཀྱི་མཐའ་ནས།
ཁྲ་ལམ་མེར་ཤར་དུས།
ཕྱེ་ལེབ་ཀྱི་ཁྱུ།
སྟོན་མཇུག་གི་ཟེའུ་འབྲུ་ལྷག་མ་རྒུམ་ཞོར།
རྒྱང་རིང་ནས་རྒྱང་རིང་དུ་འཕུར།

རི་བོ་རྒས། སྡོང་ལོ་འཐོར།
ནམ་མཁའ་དང་ས་གཞི།
དུས་ཚིགས་ཀྱི་ཁྲོད་ནས་རིམ་གྱིས་འགྱུར།
ད་དུང་།
ཆུ་བོའི་བཞུར་སྒྲ།
གཞོན་ནུ་མའི་གླུ་སྐད།
ཁ་དོག་གི་གསེང་ནས་ཡུན་གྱིས་རྒས།

                                  ༢༠༡༨ . ༩ . ༥