དབེན་རྩ་དགོན།

གཟིགས་དང་། འདི་ན་བུ་སྟོན་རིན་ཆེན་གྲུབ་ཀྱི་རྣམ་ཐར་ཡོད།

2016-12-20 博扎佛教和文化展览中心

གོང་གི་རྒྱ་ཡིག་དེ་ཡུན་ཙམ་གནན་ནས་ངེད་འཕྲིན་སྟེགས་ལ་དོ་ཁུར་མཛད་རོགགས།

བུ་སྟོན་རིན་ཆེན་གྲུབ་ནི།  རབ་བྱུང་ལྔ་པའི་ལྕགས་སྟག༼སྤྱི་ལོ་༡༢༩༠༽ལོར་ཤབ་སྨད་སྒོམ་གནས་ཞེས་པར་འཁྲུངས།  དགུང་ལོ་བདུན་ལ་ཁྲོ་ཕུ་རིན་པོ་ཆེ་སེམས་དཔའ་ཆེན་པོ་བསོད་ནམས་སེངྒེའི་དྲུང་དུ་སེམས་བསྐྱེད་དང་།  བརྒྱད་པ་ལ་སྨིན་བྱེད་ཀྱི་དབང་ཟབ་མོ་ནོས།  བཅོ་བརྒྱད་ལོན་པའི་ཚེ་མཁན་པོ་རིན་པོ་ཆེ་སེངྒེ་དཔལ་དང་།  སློབ་དཔོན་ཚད་མའི་སྐྱེས་བུ་ལས་རབ་ཏུ་བྱུང་།  དེ་ནས་མཁས་མཆོག་ཚད་མའི་སྐྱེས་བུ།  རིག་པའི་ཐེག་པ།  བསོད་ནམས་མགོན་པོ་ཞེས་གསུམ་ལྡན་གྱི་དམ་པ་དེའི་དྲུང་ནས་ཕར་ཚད་སོགས་ལ་སྦྱངས་ཏེ་ཉེར་གཅིག་པ་ལ་ཡབ་དང་ལྷན་ཅིག་དབུས་གཙང་གཉིས་སུ་གྲྭ་སྐོར་མཛད།  དབུས་ནས་མཁས་པ་ཤཱཀྱ་གཞོན་ནུ་དང་།  ཁ་རག་བྱང་གཞོན།  གཙང་ནས་མཁས་པ་དཔལ་ལྡན་སེངྒེ་དང་།  འཇམ་སྐྱ་སོགས་ལུང་རིགས་ཀྱིས་བཏུལ་བས་ཕ་བུ་སྟོན་དུ་གྲགས།  གཞན་ལས་ཕ་སྟོན་པ་ལ་བུ་སྟོན་པར་འདུག་ཅེས་བསྔགས་པས་བུ་སྟོན་དུ་གྲགས་ཞེས་འབྱུང་།  །

   ཉེར་གསུམ་པ་ལ་མཁན་ཆེན་དཀའ་བཞི་པ་གྲགས་པ་གཞོན་ནུ་དང་།   སློབ་དཔོན་བསོད་ནམས་གྲགས་པ་ལས་བསྙེན་པར་རྫོགས། འཆད་རྩོད་རྩོམ་གསུམ་གྱིས་བསྟན་པ་སྤེལ། ཐར་པ་ལོ་ཙཱ་ལས་སྒྲ་སྙན་ངག  བླ་མ་འཕགས་འོད་ལས་གསང་འདུས།  རོང་པ་ཤེར་སེང་གི་དབོན་པོ་རྡོ་རྗེ་རྒྱལ་མཚན་ལས་དུས་འཁོར་སོགས་གསན།  སུམ་ཅུ་པ་ལ་ཕར་ཕྱིན་ལུང་སྙིང་མཛད།  སོ་གཅིག་པ་ལ་ཞ་ལུའི་འཛིན་སྐྱོང་གནང་།  ཞ་ལུ་རི་ཕུག་བཏབ།  རི་ཕུག་ཏུ་ཚོགས་པ་བརྒྱ་དྲུག་ཅུ་དང་།  ཞ་ལུར་སུམ་སྟོང་བརྒྱད་བརྒྱ་རེ་འདུས།  རེ་བདུན་པ་ལ་སྒྲ་ཚད་པ་རིན་ཆེན་རྣམ་རྒྱལ་ལ་ཞ་ལུའི་གདན་ས་གཏད་དེ་ཞ་ལུ་རི་ཕུག་ཏུ་བཞུགས།  བཀའ་འབུམ་པོ་ཏི་སུམ་ཅུ་སོ་གསུམ་ཡོད།  དོན་ལྔ་པ་ཤིང་འབྲུག་ཟླ་བ་དྲུག་པའི་ཚེས་ཉེར་གཅིག་ལ་སྐུ་གཤིགས།  ཞེས་མང་ཐོས་ཀླུ་སྒྲུབ་ཀྱིས་བཙམས་པའི་བསྟན་རྩིས་ཆོས་འབྱུང་གསལ་བའི་ཉིན་བྱེད་ལྷག་བསམ་རབ་དཀར་ཞེས་པར༼ཤོགས་གྲངས་༨༠བ་༦༽གསལ་བ་དང་།  ཚལ་པའི་དེབ་དམར་མཆན་འགྲེལ་མཁས་དབང་དུང་དཀར་རིན་པོ་ཆེ་ནས་མཛད་པའི་ནང་བུ་སྟོན་ཁ་ཆེ་༼བུ་སྟོན་རིན་པོ་ཆེ་རིན་ཆེན་གྲུབ༽རབ་བྱུང་ལྔ་པའི་ལྕགས་སྟག་༼སྤྱི་ལོ་༡༢༩༠༽ལོ་ནས་རབ་བྱུང་དྲུག་པའི་མེ་འབྲུག༼སྤྱི་ལོ་༡༣༦༤༽ལོ་བར་དགུང་ལོ་བདུན་ཅུ་དོན་ལྔ་བཞུགས།  རྒྱ་གར་དུ་ཕེབས་མ་མྱོང་ཡང་།  ཐར་ལོ་ཉི་མ་རྒྱལ་མཚན་གྱི་དྲུང་དུ་སྒྲ་རིག་པ་ལ་སྦྱངས་པ་མཛད་དེ།  སྔར་བོད་དུ་མ་འགྱུར་བའི་རྒྱ་དཔེ་འགའ་ཞིག་ཀྱང་བོད་སྐད་དུ་བསྒྱུར་བར་མཛད།  མདོ་སྔགས་རིག་གནས་མཐའ་དག་ལ་མཁས་པའི་ཕུལ་དུ་ཕྱིན་པར་གྱུར་ཏེ་ཐམས་ཅད་མཁྱེན་པ་བུ་སྟོན་རིན་པོ་ཆེ་ཞེས་བོད་ཀྱི་མཁས་པ་ཀུན་གྱིས་མགྲིན་གཅིག་ཏུ་བསྔགས།  རྗེ་ཙོང་ཁ་པས་ཀྱང་བུ་སྟོན་རིན་པོ་ཆེས་ཞུས་དག་མཛད་མྱོང་བའི་འགྱུར་དང་།  བཀའ་དང་བསྟན་བཅོས་རྣམས་ལ་ཚད་མར་འཛིན་པ་གནང་།  གསུང་རྩོམ་ཡང་ལོ་རྒྱུས།  འདུལ་བ།  མངོན་པ།  ཕར་ཕྱིན།  དབུ་མ།  ཚད་མ།  སྒྲ་རིག་པ།  སྐར་རྩིས།  སྔགས་ཕྱོགས་བཅས་ཁྱོན་བསྡོམས་པོད་ཆེན་ཉི་ཤུ་རྩ་དྲུག་རྩེ་པོ་ཏཱ་ལའི་ཞོལ་པར་ཁང་དུ་པར་ཤིང་ཡོད་ཚུལ་དང་།  ལོ་རྒྱུས་རྒྱས་པ་ཁྲོ་ཕུ་བ་བསོད་ནམས་སེངྒེས་མཛད་པའི་བུ་སྟོན་གྱི་རྟོགས་བརྗོད་ངོ་མཚར་གཏམ་གྱི་རོལ་མོ་ཉེར་གཅིག་པ་དང་།  བླ་མ་མགོན་པོ་དཔལ་བས་མཛད་པའི་བུ་སྟོན་རིན་པོ་ཆེའི་རྣམ་ཐར་རིན་ཆེན་ཕྲེང་བ།  ཚེ་ཆོག་གླིང་ཡོངས་འཛིན་ཡེ་ཤེས་རྒྱལ་མཚན་གྱིས་མཛད་པའི་བུ་སྟོན་རིན་པོ་ཆེའི་གསུང་འབུམ་གྱི་དཀར་ཆག་བསྟན་པ་རིན་པོ་ཆེའི་མཛེས་རྒྱན་བཅས་སུ་གསལ་ཞེས་འཁོད།  །

   སྒྲ་ཚད་པ་རིན་ཆེན་རྣམ་རྒྱལ་གྱིས་བརྩམས་པའི་ཆོས་རྗེ་ཐམས་ཅད་མཁྱེན་པ་བུ་སྟོན་ལོ་ཙཱ་བའི་རྣམ་པར་ཐར་པ་སྙིམ་པའི་མེ་ཏོག་ཅེས་པའི་ནང་སྨན་དཔྱད་དང་།  བཟོ་རིག་བཅུད་ལེན།  མཁྱུད་དཔྱད་ལ་སོགས་མང་པོ་གསན་པའི་སྐོར་དང་།  མདོ་སྨད་བླ་བྲང་བཀྲ་ཤིས་འཁྱིལ་གྱི་གསོ་བ་རིག་པའི་ལོ་རྒྱུས་ཡིག་ཆར་ཀླུ་སྒྲུབ་ཀྱི་སྦྱོར་བ་བརྒྱད་པའི་མཆན་བུ་སྟོན་གྱི་མཛད་པ་ཞེས་པ་དང་།  ད་དུང་བུ་སྟོན་གྱི་སྨན་གྱི་བཀའ་བབས་སྐྱོར་ལུང་པ་དོན་ཡོད་དཔལ་བཟང་གི་ཡན་ལག་བརྒྱད་པའི་དཀའ་གནད་ཀྱི་མཆན་འགྲེལ་ཞེས་པའང་ཡོད་ཅེས་འཁོད་འདུག་པས་བུ་སྟོན་རིན་པོ་ཆེ་ལ་སྨན་གྱི་ཕྱག་བཞེས་ཐུན་མོང་མ་ཡིན་པ་ཞིག་ཡོད་ངེས་ལ་ཕྱིན་ཆད་མཁས་དབང་རྣམས་དང་།  འཚོ་བྱེད་དོན་གཉེར་ཅན་ཚོས་བུ་སྟོན་རིན་པོ་ཆེའི་སྨན་དཔྱད་ཐད་ཀྱི་མཛད་རྗེས་ཇི་ཡོད་ཁ་སྣོན་དང་ལེགས་སྒྲིག་ཡོད་པ་ཞུ།  །

འཕྲིན་སྟེགས་འདི་ནས་རིས་མེད་སྐྱེས་བུ་དམ་པ་རྣམས་ཀྱི་ལེགས་བཤད་དག་སྐུ་ཉིད་ཀྱི་སྤྱན་ལམ་དུ་འབུལ་གྱིན་ཡོད་པས་སྤྱི་སྒེར་གང་ལ་ཕན་པ་རེ་མཆིས་ན་གཞན་ལ་བརྒྱུད་བསྐུར་མཛད་རོགས། འདི་ནི་བོད་མི་སྤྱི་ལ་དབང་བའི་འཕྲིན་སྟེགས་ཤིག་ཡིན། འཕྲིན་སྟེགས་དོ་དམ་པས།

分享是一种美德

གོང་གི་འདི་ཡུད་ཙམ་མནན་ནས་དོ་ཁུར་མཛད་རོགས།