2018-04-30

        བོད་ཀྱི་ཡིག་གཟུགས་འབྲི་ཚུལ།

                                            * འགར་ཚེ་རྒྱལ།

          ༡༽ཡིག་གཟུགས་སྦྱོང་བའི་གོ་རིམ།
      དབུ་ཅན་དང་དབུ་མེད་གཉིས་ཀྱི་ཡིག་གཟུགས་འབྲི་སྦྱོང་བྱེད་དུས་འབྲི་སྲོལ་དང་བྱེད་ཐབས་ཀྱི་ཆ་ནས་མི་འདྲ་བར་སྣང་སྟེ། དབུ་ཅན་ཡིག་གཟུགས་ལ་མཚོན་ན་ཡིག་གཟུགས་སྣ་གཅིག་ལས་མེད་སྟབས་ཐོག་མར་གསལ་བྱེད་སུམ་ཅུ་དང་དབྱངས་བཞི། དེ་ནས་མགོ་འདོགས་སྦྱོར་ཚུལ་བཅས་གོ་རིམ་ཡོད་པའི་སྒོ་ནས་ཡི་གེ་སོ་སོའི་མགོ་དང༌། རྐེད། རྐང་པ། ལུས་བོངས་སོགས་ཀྱི་རིང་ཐུང་དང་ཞེང་ཚད་མཐོ་དམའ་བཅས་ཡ་ཀྱོག་མིན་པའི་ཚད་སྙོམས་པོར་བྱང་ཆུབ་པར་སྦྱང་དགོས། རབ་ཡིན་ན་ཐོག་མའི་དུས་ནས་ཚད་ཐིག་བཏབ་ནས་ལག་བྱང་དུ་གཏོང་རྒྱུ་གལ་ཆེ། དེ་མིན་ལག་ལ་གང་ཡོང་དང་སེམས་ལ་གང་ཤར་དུ་བྲིས་ན་ཡིག་གཟུགས་ཚད་ལྡན་གྱི་བྱང་ཆ་མི་ཡོང་པར། ངན་གོམས་ཀྱིས་ཡིག་གཟུགས་ཚད་མི་སྙོམས་པའི་འཁྱར་འཁྱོར་ཀྱག་ཀྱོག་ཏུ་འགྱུར་ངེས་ཡིན། དེ་ལྟར་ངན་གོམས་ལག་བྱང་དུ་སོང་ཕྱིན་ཆད་བཅོས་བསྒྱུར་གྱིས་ཡིག་གཟུགས་ལེགས་པོ་ཞིག་སྦྱོང་རྒྱུའི་ཞེ་འདོད་ཆེ་ཡང་སྟོང་སྣང་ཙམ་ལས་གྲུབ་འབྲས་ལེགས་པོ་ཞིག་མི་ཐོབ། དེ་བས་དང་ཐོག་ནས་ཡིད་གཟབ་བྱ་རྒྱུ་གལ་ཆེའོ།།
              དབུ་མེད་ཡིག་གཟུགས་ལ་མཚོན་ན་སྣ་གཅིག་མ་ཡིན་པར་འབྲུ་ཚ་དང༌། ཚུགས་རིང་སོགས་འབྲི་ཚུལ་རྣམ་གྲངས་དུ་མ་ཡོད་སྟབས་འབྲི་སྦྱོང་ལ་གོ་རིམ་ཡོད་པའི་སྒོ་ནས་གོམས་པའམ་ལག་བྱང་དུ་གཏོངདགོས་པ་ལས། སྦྱང་བའི་བརྒྱུད་རིམ་མེད་པར་རང་སྣང་གང་ཤར་དུ་བྲིས་ན་ཡིག་གཟུགས་ཀྱི་འབྲི་རྩལ་མཐར་ཕྱིན་པ་ཞིག་མི་ཡོང་ཚུལ་་སྔོན་བྱོན་ཡིག་མཁན་མཁས་པ་མང་པོའི་གསུང་རྒྱུན་དུ་སྣང༌།
              དེ་ལ་དང་ཐོག་ཡིག་གཟུགས་དགེ་རྒན་མཁས་པའི་མདུན་དུ་སམ་ཊའམ་སྦྱང་ཤིང་སྟེང་སྔོན་ལ་ཚུགས་རིང་གི་རིམ་པ་ནས་མགོ་བཙུགས་ཏེ། དེ་ནས་ཚུགས་ཐུང་དང༌། ཚུགས་ཆུང་བཅས་གོ་རིམ་ལྟར་བྱང་ཆུབ་པར་སྦྱངས་རྗེས། གཞི་ནས་ཤོག་བུའི་ཐོག་འབྲི་བའི་མགོ་བཙུགས་པའི་རིམ་པ་ལ། དང་པོར་ཚུགས་ཐུང་དང༌། དེ་ནས་འཁྱུག་མ་ཚུགས།འཁྱུག འཁྱུག་ཆེན་བཅས་རིམ་པས་གཟབ་ནན་ཞིབ་ཚགས་ཀྱིས་སྦྱངས་ཏེ་བྱང་ཆུབ་པ་བྱེད་དགོས་པ་ལས་སྔ་ཕྱི་གོ་རིམ་མེད་པར་གང་དྲན་དྲན་དུ་འབྲི་མི་རུང༌།     
      མདོར་བསྡུས་ཏེ་བཤད་ན་དབུ་མེད་ཡིག་གཟུགས་འཁྱུག་བྲིས་སོགས་གཞི་རྐང་ཚགས་ཚུད་པོ་དང་ལེགས་པོ་ཞིག་འབྲི་ཐུབ་པར། ཐོག་མར་ཚུགས་རིང་ལག་བྱང་གི་སྦྱང་བ་ངེས་པར་སྔོན་དུ་འགྲོ་དགོས་སོ།། 
                  ༢༽སྨྱུ་གུ་བཟོ་བཀོལ།
        སྨྱུ་གུ་བཟོ་བའི་རྒྱུ་ནི་ཤིང་དང་སྨྱུག་མ་སོགས་ཡིན་པ་ལས་ཡོངས་ཁྱབ་གཙོ་ཆེ་བ་ནི་སྨྱུག་མ་ཡིན་ཞིང༌། སྨྱུ་གུ་བཟོ་བའི་རྒྱུ་སྨྱུག་མ་བཅད་གཏུབ་ཀྱིས་མེ་ཐབ་སོགས་ཀྱི་དུད་ཁུང་ཁར་བཏགས་ཏེ་དུ་བ་སིམས་ནས་སྲ་སྐམ་ཆགས་རྗེས་གཞི་ནས་སྨྱུ་གུ་བཞོགས་བཟོ་བྱེད་དགོས། སྨྱུ་གུའི་རིང་ཐུང་ཅི་དགོས་ཚད་བཅད་ཀྱིས་རྣོ་ངར་ཅན་གྱི་གྲིས་སྨྱུག་ཁ་བཟོ་སའི་རྩི་ཤུན་ལ་གས་ཆག་གི་རྨ་མི་བཏོད་པར་སྨྱུག་རྫིང་སོགས་བཟོ་དགོས། དེ་ལ་སྨྱུག་རྫིང་ཚད་རན་ཞིང་ཟབ་པོ་བཟོས་ན་སྨྱུག་ཁ་སྨྱུག་ཆུའི་ནང་འཛུགས་་ཐེངས་རེ་ལ་སྨྱུག་ཆུ་མང་པོ་འཛིན་ཐུབ། སྨྱུག་རྩེའི་སིལ་ཡུར་བཏོད་སྐབས་དམ་པའི་ཚུལ་དུ་བཟོས་ན་ཡིག་གཟུགས་འབྲི་སྐབས་སྨྱུག་ཆུ་ཤོག་སྟེང་དུ་མི་ཁྱབ་པའམ་མི་འདའ་བ་དང་། སིལ་ཡུར་ཅུང་ལྷོད་ན་སྨྱུག་ཆུ་རྒྱུག་པར་ཕན་པ་བཅས་ཀྱི་ཁྱད་ཆོས་ཡོད།
      སྨྱུག་ཁའམ་སྨྱུག་ཁམ་བཟོ་སྐབས་ཆེ་ཆུང་ཡིག་གཟུགས་ཕྲ་རགས་ཀྱི་ཚད་གང་འདྲ་ཞིག་དགོས་འདོད་ལྟར་སྨྱུག་རྩེའི་རྒྱབ་ངོས་ནས་དབུ་ཅན་ཡིན་ན་སྨྱུག་ཁམ་གཡོན་དུ་གསེག་ཆུང་དང༌། དབུ་མེད་ཡིན་ན་གཡས་སུ་གསེག་ཆུང༌། ལན་ཝར་གཉིས་ལ་གཡས་སུ་གསེག་ཆེན་དུ་གཏུབ་གཅོད་བྱེད་དགོས། བཅད་གཏུབ་ཀྱི་སྨྱུག་ཁའི་ཟུར་གཉིས་རྐོང་འབུར་གྱི་མཐོ་དམའ་མེད་པར་མཉམ་དགོས་པ་གལ་ཆེ་བ་དང༌། སྨྱུག་སྐེད་མཐེབ་མཛུབ་ཀྱི་འཛིན་ས་ཟླུམ་ཞིང་འཇམ་པོ་བཟོས་ན་ཡི་གེ་འབྲི་དུས་སྨྱུ་གུ་བསྐོར་བདེ།
        དེ་ལྟར་སྨྱུ་གུ་ལེགས་པར་བཟོས་ཚར་རྗེས་སྨྱུག་རྩེ་མར་ཁུ་ཁོལ་མའི་ནང་བཙུགས་ཏེ་ཕྱིས་ན། སྨྱུག་ཁ་སྲ་མཁྲེགས་ཆགས་ཏེ་གས་སིལ་མི་འབྱུང་དང༌། ཡིག་གཟུགས་འབྲི་དུས་སྨྱུག་ཆུ་རྒྱུག་པར་ཕན་རླབས་ཆེ་བར་གསུངས།
                ཡིག་གཟུགས་འབྲི་སྐབས་སྨྱུ་གུ་འཛིན་སྟངས་དང་ལུས་ཀྱི་འདུག་སྟངས་ཀྱི་ཆ་ནས་ཀྱང་སྒྲིག་འཛུགས་ཡོད་དགོས་པ་ཞིག་སྟེ། མཐོ་དམའ་ཚད་དང་ལྡན་པའི་མདུན་ཅོག་སོགས་ལ་བརྟེན་ནས་འབྲི་བའི་སྐབས། ལུས་གཡས་གཟུར་དང་གཡོན་གཟུར་མ་ཡིན་པ། ཧ་ཅང་སྒུར་བ་དང་དགྱེ་བའང་མ་ཡིན་པར་འདུག་ཚད་རན་པར་བསྡད་དེ་འབྲི་དགོས་པ་དང༌། ཡང་ན་སར་བསྡད་ནས་འབྲི་སྐབས་སྐྱིལ་དཀྲུང་གིས་རྐང་པའི་པུས་མོའི་སྟེང་འབྲི་ཤོག་གམ་སམ་ཊ་བཞག་སྟེ་ལུས་སྟོད་ཀྲོང་ངེར་སྲོང་ནས་འབྲི་དགོས། སྨྱུ་གུ་འཛིན་སྐབས་མཐེབ་མཛུབ་གཉིས་དམ་ལྷོད་རན་པས་སྨྱུ་གུ་འཆང་ཞིང་དཀྱིལ་མཛུབ་སྨྱུ་གུའི་འོག་ཏུ་བརྟེན་ཏེ། མཛུབ་མོ་མས་མ་གཉིས་ནང་དུ་བསྐུམ་གུག་གིས་སྤར་ཁྱིམ་དུ་ཕུག་རོན་གྱི་སྒོ་ང་ཤོང་ཚད་ཙམ་སྟོང་པའི་ཚུལ་ཅན་དུ་བྲིས་ན་ཡིག་གཟུགས་ལེགས་པོ་ཡོང་བ་མ་ཟད། ལག་སོར་གྱི་ཁམས་རྩ་རྣམས་རང་རྣལ་དུ་བབས་ནས་ཡི་གེ་བྲིས་ཡུན་ཅི་ཙམ་རིང་ཡང་སོར་ཚུགས་དང་མཁྲིག་ཚུགས་མི་ན་བ་བཅས་ཀྱི་ཕན་པ་ཆེ་བར་ཡིག་མཁན་མཁས་པའི་གསུང་རྒྱུན་དུ་གྲགས་པས་དེ་ལྟར་ལག་ལེན་དུ་བསྟར་རྒྱུ་གལ་ཆེའོ།།

      ཁོ་བོས་བྲིས་པའི་<<བོད་ཀྱི་ཡིག་གཟུགས་བྱུང་རིམ་དང་འབྲི་ཚུལ་གནད་བསྡུས་>>ཞེས་པ་ལས་ཚན་བཤུས།